Fyrsta skóflustungan að nýju húsnæði Volvo atvinnutækja

Egill Jóhannsson forstjóri Brimborgar tók fyrstu skóflustunguna mánudaginn 2. maí fyrir nýja verkstæðis- og þjónustubyggingu fyrir Volvo atvinnutæki, að Hádegismóum 7. Þar verður til húsa sala og þjónusta fyrir Volvo vörubíla, vinnuvélar, rútur og Volvo Penta bátavélar ásamt þjónustu og sölu Renault Trucks vörubíla.

„Þetta eru merkileg tímamót sem við höfum beðið lengi eftir. Skóflustungan er fyrsta skrefið í að byggja upp enn öflugri atvinnutækjadeild. Stór tæki þurfa mikið at­hafna­rými svo það verður bylting að komast í sérhannað hús­næði þar sem allt aðgengi er hannað frá grunni með slík tæki í huga. Nýtt húsnæði mun auka hagræði fyrir viðskiptavini og vinnuaðstaða fyrir starfsmenn verður framúrskarandi. Framkvæmdir munu hefjast fljótlega og stefnt að verklokum á næsta ári“ sagði Egill Jóhannsson við skóflustunguna.

Lóðin er 14 þúsund fermetrar og stendur við stofnæðar svo aðgengi er sérlega gott fyrir stærri tæki. Hönnun stendur yfir og í framhaldi verður farið í útboð á einstökum verkþáttum. Mansard teiknistofa sér um hönnun byggingarinnar, VSB verkfræðistofa hannar burðarvirki, lagnir og rafkerfi, Efla sér um brunahönnun, Teiknistofan Storð um lóðarhönnun og KÞ ráðgjöf er umsjónarmaður verkkaupa.

Með Agli á þessum stóra degi voru frá Brimborg Jóhann Jóhannsson stjórnarformaður, Arnór Jósefsson hluthafi, Þorsteinn Arnórsson stjórnarmaður, Margrét Rut Jóhannsdóttir framkvæmdastjóri mannauðs- og gæðasviðs, Hólmar Ástvaldsson framkvæmdastjóri fjármálasviðs, Jóhann Rúnar Ívarsson þjónustustjóri Volvo atvinnutækjasviðs, Kristinn Már Emilsson framkvæmdastjóri Volvo atvinnutækjasviðs ásamt Karli Þráinssyni ráðgjafa Brimborgar við framkvæmdina.

 

Hópmynd